分享至微博
分享至 Facebook
列印

苟芸慧愈谷愈脹 決心搣肥名

05 - 11 06:31
苟芸慧要搣甩「肥苟」這個稱號 。
苟芸慧要搣甩「肥苟」這個稱號 。
1 / 3

苟芸慧愈谷愈脹 決心搣肥名

【東方日報專訊】苟芸慧昨日接受本報專訪,自爆被封「肥苟」感覺不受尊重,又謂壓力大常令身形暴脹,曾有面對緋聞以淚洗面前科的她,已學識獨自面對,對於會否公開多謝郭富城緋聞帶挈令人氣急升,她笑言:「要多謝佢,咪要多謝埋阿Lynn?」

苟姑娘因骨架問題,身形經常成笑柄,甚至被封「肥苟」,她說:「起初覺得呢個名好唔尊重,但冇得控制人哋點講,惟有化為動力,希望早日搣甩呢個名。我壓力大人就會脹,身形比人哋大隻,就算食好少都肥,雖然我覺得女仔肥少少有福氣,但我已經去通淋巴,我明白瘦先專業,但好多工作鍾意我肥嘟嘟。(點睇人話你《金枝慾孽貳》廣東話唔正,係『ABC宮女』?)個名幾得意,我中文唔好,會努力改進。」

苟姑娘又指未諗如何獎勵自己,她說:「係都諗咗媽咪先,就嚟母親節,以前母親節我會煮早餐畀佢食,今年返唔到去,其實我賺幾多錢都畀晒佢,由佢幫我投資,今年係我喺香港第四年,我都想買香港樓,但我未有香港身份證,依家買好重稅。(加拿大買咗樓?)未,不過喺嗰邊買樓,肯定大過香港。」

唔會單獨約城城

苟姑娘對於受城城緋聞帶挈,兩月賺百萬,她說:「有少少誇張,我唔知搵幾多,但就冇100萬咁多。(多謝城城?)感恩可以同佢拍廣告同MV,但拍完冇再聯絡,要多謝佢,咪要多謝埋阿Lynn(熊黛林)?佢哋分開好可惜,但我哋唔應畀評價,我依家清白咗,人輕鬆咗、開心咗。(但Lynn好似嬲你?)我覺得佢唔係話我,見到面我會主動打招呼,唔想佢誤會,想主動示好。(城城約你會點?)單獨約會唔去,工作上嘅可以接受,依家所有男仔都係平等,要拍拖,我會長時間觀察對方。(城城有機會?)人嘅命運好難估,我唔想講到好死,但拍拖講性格同timing,依家未係時候,我唔心急拍拖。」

文:影視組

分享至微博
分享至 Facebook
列印
關鍵字:娛樂
新浪推介